Slide thumbnail
Slide thumbnail

ພິທິປະດັບຫລຽນໄຊ ຂອງບໍລິສັດ ສະຕາ ໂທລະຄົມເນື່ອງໃນໂອກາດ ວັນສ້າງຕັ້ງ ບໍລິສັດ ສະຕາ ໂທລະຄົມ ຄົບຮອບ 10 ປີ

ວັນທີ 29/5/2018 ບໍລິສັດ ສະຕາ ໂທລະຄົມ ໄດ້ຈັດຕັ້ງພິທີ ປະດັບຫລຽນໄຊ ແລະ ມອບໃບຍ້ອງຍໍຂອງລັດຖະບານ ແຫ່ງ ສປປລາວ ໃຫ້ກົມກອງລວມໝູ່, ບຸກຄົນ ເນື່ອງໃນໂອກາດ ວັນສ້າງຕັ້ງ ບໍລິສັດ ສະຕາ ໂທລະຄົມຄົບຮອບ 10 ປີ  ( 01/04/2008 – 01/04/2018 ) ໃຫ້ກຽດເຂົ້າຮ່ວມ ພິທີໃນຄັ້ງນີ້ ແມ່ນ ທ່ານ ພົທ ຈັນສະໝອນ ຈັນຍາລາດ ກົມການເມືອງສູນກາງພັກ ລັດຖະມົນຕີ ກະຊວງປ້ອງກັນປະເທດ ແລະ ທ່ານ ຫວຽນ ບາ ຮຸ່ງ ເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປລາວ ປະທານສະພາບໍລິຫານ ບໍລິສັດພ້ອມຄະນະອຳນວຍການ ບໍລິສັດ ແລະ ບັນດາທ່ານແຂກ ຈາກກະຊວງ ທີ່ກ່ຽວຂ້ອງ ພ້ອມພະນັກງານຢູນີເທວທົ່ວປະເທດ.

ພິທີປະດັບຫລຽນໄຊ ຂອງບໍລິສັດສະຕາໂທລະຄົມ ຄັ້ງນີ້ເພື່ອເປັນການຢັ້ງຢືນເຖີງຜົນງານການສູ້ຊົນບຸກບືນຂອງຢູນີເທວເວົ້າສະເພາະ , ແມ່ນໝາກຜົນແຫ່ງການຮ່ວມມືຂອງສອງພັກ – ສອງລັດຖະບານ ລາວ-ຫວຽດນາມ , ແມ່ນໝາກຜົນຂອງການສູ້ຊົນບຸກບືນ  ສຸມທຸກເຫື່ອແຮງສະຕິປັນຍາ ຢ່າງບໍ່ຮູ້ອິດຮູ້ເມື່ອຍຂອງການນຳ ຮ່ວມກັບພະນັກງານ – ວິຊາການ ທັງໝົດທົ່ວບໍລິສັດ . ພາຍໃນພິທີ ປະດັບຫລຽນໄຊຄັ້ງນີ້ແມ່ນ ໄດ້ປະດັບຫຼຽນໄຊ ແຮງງານ ຊັ້ນ 2 ໃຫ້ແກ່ບໍລິສັດ ສະຕາ ໂທລະຄົມ, ປະດັບຫລຽນໄຊ ພິລະອາດຫານ ຊັ້ນ II ຈໍານວນ 15 ສະຫາຍ , ປະດັບຫລຽນໄຊພິລະອາດຫານຊັ້ນ III ຈໍານວນ 42 ສະຫາຍ ໂດຍໃຫ້ກຽດຂື້ນມາປະດັບຫລຽນໄຊຄັ້ງນີ້ ແມ່ນທ່ານ ພົນໂທ ຈັນສະໝອນ ຈັນຍາລາດ ກົມການເມືອງສູນກາງພັກ  ລັດຖະມົນຕີ ກະຊວງປ້ອງກັນປະເທດ, ນອກນັ້ນຍັງໄດ້ມອບໃບຍ້ອງຍໍຂັ້ນ ກະຊວງປ້ອງກັນປະເທດ  ຈຳນວນ 211 ສະຫາຍ, ມອບໃບຍ້ອງຍໍກົມໃຫ່ຍການເມືອງກອງທັບ ຈຳນວນ 269 ສະຫາຍ.

ບໍລິສັດ ສະຕາ ໂທລະຄົມ ໄດ້ສ້າງຕັ້ງຂື້ນ ໃນວັນທີ່ 1 ເມສາ 2008 ໂດຍການຮ່ວມທຸລະກິດລະຫ່ວາງ ລາວເອເຊຍ ໂທລະຄົມ ແລະ ບໍລິສັດ ຫວຽດເທວ ໂກໂບ  ທີ່ໄດ້ມີການເຊັນສັນຍາຮ່ວມມືໃນວັນທີ່25/11/2007ແລະ ເປີດນໍາໃຊ້ເຄື່ອງໝາຍການຄ້າຢູນີເທວ ຢ່າງເປັນທາງການໃນວັນທີ່ 16/10/2009.

ຕະຫລອດໄລຍະເວລາ 10 ປີ ຢູນີເທວມີລາຍຮັບລວມ ກ່ວາ 1,3 ຕື້ USD ແລະ ມອບອາກອນໃຫ້ລັດ 350 ລ້ານ USD , ເປັນເຄືອຂ່າຍທີ່ນອນໃນອັນດັບແຖວໜ້າ, ມີຈໍານວນເລກ ໝາຍຜູ້ນໍາໃຊ້ມືຖື 3 ລ້ານເລກໝາຍ ຫຼື ສ່ວນແບ່ງຕະຫຼາດ 52%, ລະບົບພື້ນຖານໂຄງລ່າງເຕັກນິກກ້ວາງໃຫ່ຍທີ່ສຸດ ມີຈໍານວນສູນສະຖານີສົ່ງສັນຍານ 2G/3G/4G ລວມຫຼາຍກວ່າ 6000 ສູນ ເຂດປົກຄຸມສັນຍາຍກວມ 95% ທົ່ວປະເທດ.

ຜ່ານໄລຍະດໍາເນີນທຸລະກິດ 10 ປີ ແຫ່ງພັດທະນາ, ໃນໄລຍະຕົ້ນຈາກເຄື່ອຂ່າຍ ທີ່ມີສ່ວນແບ່ງຕະຫຼາດ ທີ່ຢູ່ໃນອັນດັບທ້າຍໃນຂະແໜງການໂທລະຄົມໃນລາວ; ບໍລິສັດໄດ້ສຸມໃສ່ວຽກງານລົງທຶນ ກໍ່ສ້າງພື້ນຖານໂຄງລ່າງ- ສ້າງແລະພັດທະນາການບໍລິການ  ໃນທຸກດ້ານ ໃຫ້ມີຄວາມແຕກຕ່າງ ນໍາເອົາບໍລິການລົງເຖິງເຂດທ້ອງຖິ່ນທີ່ຫ່າງໄກສອກຫຼີກໃນຂອບເຂດແຂວງທົ່ວປະເທດ, ເຖິງປະຈຸບັນຢູນີເທວ ໄດ້ກາຍ ເປັນໂທລະຄົມທີຢູ່ໃນລະດັບແຖວໜ້າໃນລາວ ເຮັດໃຫ້ວຽກງານໂທລະຄົມໄດ້ຮັບການຍົກສູງທຽບທັນກັບພາກພຶ້ນ, ກໍ່ຄືການປະກອບສ່ວນຢ່າງຫຼວງຫຼາຍຕໍ່ການພັດ ທະນາເສດຖະກິດ-ສັງຄົມຂອງລາວ. ດັ່ງນັ້ນ, ມັນເປັນສີ່ງຢັ້ງຢືນໄດ້ວ່າ: ການຮ່ວມທຸລະກິດຂອງບໍລິສັດລາວ-ເອເຊຍໂທລະຄົມ ແລະ ບໍລິສັດ ຫວຽດເທວໄດ້ກາຍເປັນຂີດໝາຍແຫ່ງຜົນສໍາເລັດຂອງການຮ່ວມມືຂອງສອງຊາດ, ສອງກອງທັບ ລາວ-ຫວຽດນາມ, ຫວຽດນາມ-ລາວ.

ນອກຈາກວຽກງານການຂະຫຍາຍລະບົບພື້ນຖານໂຄງລ່າງຢ່າງກ້ວາງຂວາງໃນທົ່ວປະເທດ ເພື່ອໃຫ້ ສັນຍານປົກຄຸມ ລົງເຖິງເຂດຫ່າງໄກສອກຫຼີກ ແລະ ນັບທັງເຂດທີ່ບໍ່ເຄີຍມີສັນຍານໂທລະສັບມືຖືມາກ່ອນ ເທົ່ານັ້ນ; ວຽກງານປະກອບສ່ວນຊ່ວຍເຫຼືອສັງຄົມ ຢູນີເທວກໍ່ຖືເປັນສໍາຄັນຄຽງຄູ່ກັບວຽກງານດໍາເນີນທຸລະກິດໄລຍະຜ່ານມາຢູນີເທວໄດ້ ສະໜັບສະໜູນຫຼາຍໂຄງການລວມມູນຄ່າການສະໜັບສະໜູນທັງໝົດແມ່ນ 13ລ້ານ ໂດລາ ເຊິ່ງໂຄງການທີ່ພົ້ນເດັ່ນແມ່ນ ມອບໂຄງການສະໜັບ-ສະໜູນ ອິນເຕີເນັດລົງສູ່ໂຮງຮຽນຫຼາຍ ກວ່າ 900 ໂຮງຮຽນ ນໍາໃຊ້ອິນເຕີເນັດແບບບໍ່ເສຍຄ່າ ນໍາເອົາຜົນປະໂຫຍດມາສູ່ປະຊາຊົນລາວບັນດາເຜົ່າ.

ບໍ່ພຽງແຕ່ເທົ່ານັ້ນ ຢູນີເທວ ຍັງໄດ້ຮັບຄວາມເຊື່ອໝັ້ນຈາກລັດຖະບານ ໃນການເປັນຜູ້ຈັດຕັ້ງຜັນຂະຫຍາຍ ບັນດາລະບົບທີ່ສຳຄັນເຊັ່ນ : ສະໜອງຟອນພາສາລາວ, ການສອບເສັງອອນລາຍ  Olympic; ລະບົບ ຄຸ້ມຄອງພົນລະເມືອງ, ສະໜອງລະບົບ Core Banking ແກ່ທະນາຄານ ສປປລາວ.

ໃນອານາຄົດ , ຢູນີເທວຍັງຈະສືບຕໍ່ ຍົກສູງດ້ານຜະລິດຕະພັນ, ພ້ອມດຽວກັນນັ້ນ ຍັງພັດທະນາລະບົບເທັກໂນໂລຢີ ດ້ານການເງິນ – ການທະນາຄານ 4.0 , ລະບົບດ້ານ ຂໍ້ມູນສາທາລະນະສຸກ , ກິລາ, ຄວາມບັນເທີງ ເພື່ອປະກອບສ່ວນເຂົ້າໃນການພັດທະນາຍຸກ 4.0ເພື່ອພັກດັນການພັດທະນາຂອງປະເທດຊາດ.